| lyric | 1. Büab, wenn ich diär äis derf raatä:
blyyb braav leedig, nimm käi Fräu!
d'Mäitli, diä sind all vergraatä,
sind fir yyseräinä z schläü,
tiänt dr schmäichlä und scharwänzlä,
äister um die ume tänzlä,
hend s dr Ehring, de isch s glyy
mit dr Liäbi äü verbyy!
2. Het di äini i dä Händä,
het si fescht dich äü am Schopf!
So zeigt d Haar a irnä Zändä,
und dü bisch än armä Tropf!
Z bättlä nitzt di nyt undz bittä,
Fertig sind dää scheenä Zytä
und dü merksch mit Schreck ohjee,
um myy Fryyhäit isch äs gsche!
3. Wettisch äinisch dü ga jassä
bim-nä Scheppli güätem Wyy.
Laat si nit mit sich la gschpassä:
leetigs Wasser derfs nur syy.
Träisch dr Chopf bim z Chiilägah.
Lüägsch dä hibschä Mäitli nah:
Mängisch wärdet ruuchä Wind!
Das isch jetzt ä schwääri Sind.
4. Hesch zu nyymeh eppis z sägä,
folgä müäsch, äs isch ä Grüüs,
wortlos müäsch dyys Schicksal trägä,
si isch Mäischter jetz im Hüüs.
Und verläidet diär äü ds Lääbä,
dyyni Syyfzger sind vergääbä.
Mängisch wärdet äbä d Lyt,
erscht z spaat isch, gheerig gschyd.
Drum lass d Mäitli, blyyb bim Wyy,
lass dr neechscht dr Lappi syy. |