| lyric | 1. dr sidi abdel assar vo el hama
het mal am morge früe no im pyjama
ir strass vor dr moschee, zwöi schöni ouge gseh,
das isch dr afang worde vo sym drama.
2. s isch tochter gsy vom mohamed mustàfa
dr abdel assar het nümm chönne schlafa,
bis är bim mohamed um d hand aghalte het
und gseit: i biete hundertfüfzig schaf a.
3. dr mohamed het gantwortet: bi allah,
es fröit mi, dass mi tochter dir het gfalla,
doch wärt isch si my seel zwöihundertzwänzg kamel
und drunter chan i dir sen uf ke fall la.
4. da het dr abdel assar gseit: o sidi,
uf so n e tüüre handel gang i nid y,
isch furt het gly druf scho e billigeri gno,
wo nid so schön isch gsy, drfür a gschydi.
5. doch wenn es nacht wird über der sahara,
luegt är dr mond am himmel hell und klar a
und truuret hie und da de schöne n ouge na
und dänkt: hätt i doch früecher afa spara. |