| lyric | 1. dr hansjakobli und ds babettli
hei mit em chuchitaburettli
es spili zäme gspilt zum göisa
he he frou meier het das gheisse.
2. da isch zum byspil zersch ds babettli
druf gschlätteret uf ds taburettli
und hansjakobli, wo süsch zaagget,
isch tifig tifig drunder gschnaaget.
3. ganz lut het obehär ds babettli
jitz gstampfet uf das taburettli
bis dass dr hansjakobli dopplet
so lut het undenufe topplet
4. und grüegt: hehe frou meier machet
doch nid so krach – su du hei si glachet
und är isch obe gsi äs unde
und ds spil het disewäg stattgfunde.
5. vo wäge grad so i däm Spili
wi z grächtem – Byspil git es vili –
isch jede – de derfür wird gchrampfet –
gärn dä wo obenabe stampfet.
6. es isch ni jede wi ds babettli
so harmlos uf sim taburettli
drum lueget das wi hansjakobli
gäng einen undenufe toppli.
7. I wett fasch säge d wält wär freier
wenn meh würd grüeft: hehe frou meier! |