| lyric | 1. Wenn miär dr liäb Gott säiti:
„Wo witt dähäimä syy?“
Wenn syyni Hand mich träiti
dur alli Länder hi,
chäm Sisigä, das Dörfli
am grüanä-n Urnersee,
i säit: „Lass mi blyybä
und zaig miär nümmä meh.“
2. Wo under Chriäsibäümä
ä nüüi Chilä staht
und äim i allnä Träumä
niä ganz verlaufä laat,
wo klar der Bärgbach ruuschet
zumliäbä Länderssee.
Hed äinä das, der tuuschet
syy Wält mit niämerm meh.
3. Und wenn i müädä wärdä
und darf i häimäzuä
und räist mä miär uf Ärdä
myys Bett zur letschtä Ruäh:
Gib miär ä Platz im Himmel
am Fenschter gägä See,
uf Sisigä, myys Dörfli,
denn wüüsch i nümmä meh. |