| lyric | 1. Cun schlantsch ha sa bindera
l'ardit favougn splajà,
cun triumfanta tschera
dalcuolmen giò clamà:
„At sdaisda ma vallada
our da teis sön profuond,
quell’ ura ais rivada
cha tü bramà hast zuond!“
2. E ruott’ ais la fradüra,
e lamma ais la not,
ün ajer da vantüra
va tras cuttür’ e god,
el clama las lavinas,
d’auals il quaid murmur,
e milli funtaninas
chi sbuorflan dad ir sur.
3. I’l sain da mamma terra
as sduvlan seis infants,
lur cheus vers la glümera
els stendan tants e quants.
Da minchülettas prunas
al di dan il bainvgnü,
surtrand cun lur curunas
ils prats cun alb tessü.
4. Be buorfs ais la manzina,
raduoinds per as drivir,
e palesand chantina
il merl seis dutsch sentir.
I’l cuor da giuvna matta
dschermuoglia prüm’ amur
Beà quel chi la chatta:
el clegia frais-cha flur! |