| lyric | 's chunt neimer über d'Weid.
Was trait r a sym Chleid?
Vil Bletter, rot und dür.
Är sait: Do ist mys Hus.
Herbst, gang zuem Tämpel us!
Und stoßt dr Rigel vür.
Was nint r us dr Schoß?
Ä Bänsel, risegroß.
Är fot eis z’wyßge a.
Är wyßged ohni Änd.
Potzblitz, wie glänzed d’Wänd!
Keis Mösli gseht me dra.
Jä, isch mer jetz nüd gsy,
Es schlirggi nu ächli
Det a dr Türefell?
Nei, bhüetiß, weles Pfus!
Är stäubt dr Gipssack us.
Ist das ä wilde Gsell!
Jetz, meini, sätt’s es tue!
Jetz gschlüßt r d’Schybli zue.
Si glitzered wie Ys.
’s Christchindli chan jetz cho.
Är hät ’s Hus, mueß em’s lo,
Verputzt äs wien äs nüs. |