| lyric | Dr Winter macht eim dumm und taub.
Drum grüeßdi Gott, jungs Buechelaub,
Wie hani uf di planged!
Weiß ’s nüd, all my Gidanke hüt
Gsehnd us wie luter Hochsiglüt,
Wo au voll Strüßli hanged.
Züntume schießed Gresli uf.
’s Fyfälterli, was trait’s duruf?
Äs sibegfarbeds Tschöippli.
Blybt doch im Schatte neimewo
Äs Stüüdli, beit äanandreno
Stoht’s voll grasgrüeni Läubli.
Plattvoll vo Glyßlene ist d’Weid.
D’Bärgchriesbäum stönd im Fyrtigchleid;
Ä chrydewyße Plunder.
Das wär nu kei sä große Sach;
Glych, ’s Näst voll Eili undrem Dach,
Das ist dä scho äs Wunder.
Und säg mer eine was er wil,
Verstand und Ote stönd eim still,
Was d’Sunne alls cha wärche.
Ha gester dänkt: Äh. wäri tod!
Hüt hani ’s Aug voll Morgedrot;
’s Härz wimsled mer vo Lärche. |