| lyric | Hüt weißi as i läbe;
Ha Atzig und ha Wy;
Dr Chopf voll Chilbimusik.
Drum wili lustig sy.
Was wili d’Stund vertrure,
Wo mir äs Freudli bringt?
Worum goh ’s Ohr verschoppe,
Wän’s i mer ine singt.
Wän’s andere nüd groted,
Mich gpht’s bigost nüd a.
Dr Wy und d’Freud und d’Liedli
Wend Bodewärmi ha.
Si jöisled fryli, d’Freude
Und ’s Läbe syg gly us.
He äbe drum, sä pak si,
Chunt d’Freud emol is Hus!
Hüt, Wyndli, la di trinke,
Hüt, wil die trinke mag.
Hüt, Maitli, la di schmützle!
Es breicht dr’s nüd alltag.
Mer sind jo kei Nachthüel,
Wo ’s Groschse hend im Bluet.
Am Huet ä liechti Fädre
Stoht üsersglyche guet.
Und bini einist gstorbe,
Wer streichled dä mys hoor?
Dys Händli chunt mer nümme,
Und beiti tused Johr.
Dys Lache köiri niemeh.
Und liggi müslöistill,
Ist us der Ringelreihe,
Us für mi Tanz und Spil.
Heijuppedihee, frylustig!
Und d’Freudli nend s’, wos git!
Und tanzed i dr Fasnecht!
Lang, lang goht d’Fastezyt. |