| lyric | Wo chamer öppfis Schöiners gseh
As igänts Mai dr Zürisee
Mit syne grüene Hüfle.
Tupfäbe ist dr See und blo.
Keis Jümpferli verstoht’s äso
Sys Schöissli uszbügle.
Wie stönd im Bluest allsäme Bäum!
Beit nu, im Herbst sind s’ volle Chröim
Vo Pflume, Öpfel, Bire.
Äh, wüßti wo’s Lokpfyffli lyt!
Äs wachsi neimeso im Gstüüd.
Was cha’s dän ah? ’s tuet vüre.
Äs wie druf blos’ äs Sunntigschind,
Sä chämed d’Härli wie dr Wind
Us alle Stuudepösche.
Äs Schümli gäb’s im See im Schwick,
Und Wasserjümpferli allsdick,
Si gumped drus wie Frösche.
O wäni au das Pfyffli g’fund!
Jetz wo a See dr Maie chunt
Dur d’Wybärg choge chranze.
I spilti’s übere bloe See.
Und stiended Jumpfre uf wie heu,
Mit allne wetti tanze. |