| lyric | Wie isch au brüetig überei.
Sä tüppig, schumm z’verlyde.
Dr Gugger söll hüt schryber sy;
Hüt lyt me eis i d’Wide.
Es ist mer jo scho lang vertleidt,
’s ganz Johr us d’Fädre z’schwinge.
Jetz liggi einist schattesyts,
Und lo dr Gugger singe.
I true i keim Morgedrot.
Äs bringt die gäälig Sunne.
Wän tags ä WEid voll BLueme stoht,
Am Obed sind s’ verbrunne.
Ist früeh dr Himel wien äs Hus
Mit rote Fähne gsägned,
Und ’s Härz meint, ’s gäb äs Freudefäst,
Am Obed sind s’ verrägned.
Drum liggi eis is Widegtüüd,
I Schatte, teuff i Schatte,
Und traume, Üserherrged syg
Ä ris und d’Wält ä Chratte.
Und äntli stiendr einist uf,
Und chehr, z’tratz allem Gschnätter,
Dr Chratte um und chlopf ä us
I alli Dunderwätter. |