| lyric | Han emol äs Röisli gwüßt.
Wo? Is Nochbers Garte.
’s hät vil roti Blettli ka;
’s chöt keis Gloriängeli
Schöineri zwei Fäkli ha.
Han ämol äs Maitli gwüßt.
Wo? Is Nochbers Hüsli.
Hät äs heiters Tschüüppli ka;
’s chöt kei Stuehl im Himelrych
’s schöiner Überzügli ha.
’s Röisli gschaut si anenand.
Wo? Im Rägegüntli.
Sait zum Byli: Gruebe nüd
Bis äs Dotzed Chnöpf ufgänd
I mym blute Föiregstüüd.
’s Maitli spiegled si all Schwik.
Wo? Im Chatzeschybli.
Juzed: Hochsig hani gly!
Wil dän au äs Wiegli ha
Und äs Dotzed Göifli dri.
’s ist ä heiße Summer cho.
Wo? Is Nochbers Garte.
’s Röisli hät dr Föihn vertrait.
’s Maitli i sym Hochsighämp,
Hand s’ is Chilelöchli gleit. |