| lyric | Keis Lüftli goht, kei Vogel singt.
Wie isch sä brüetig heiß!
Los! Tröpfleds det nüd ob em Wald?
Blöiß töint’s wie wän äs Tröpfli fallt,
Heuscht alls: Mir eis, mir eis!
Dr Liebgott ist vom Schoff verwacht,
Ninnt ’s Chäntli vo dr Wand,
Und hät zue jedrem Blüemli gsait:
Und här dys Chelchli, tue mer Bscheid!
Und füllt ems bis a Rand.
Sant Peter, bstell mer ’s Sunnerad!
D’Wält ist jo volle Staub.
Druf won r mit em Chäntli laufft.
Glylacht gseht alls us wie frisch tauft,
’s schnuft uf i Gras und Laub.
Dr heilig Peter chäuzt i Bart:
Jetz bstoht mys guldi Rad.
Män’s Liecht usgoht, ’s ist nüd my Schuld.
He, sait dr Liebgott, häb Giduld,
’s hät numeh i dr Lad!
Jetz lauft r im ne Güntli no.
Vier Fröschli sitzed det.
Är schütted äs par Gütschli dri.
Si dänked, ’s gäb hüt Ehrewy,
Und singed äs Quartett.
Jetz fiserleds uf Nachbers Chrut;
Jetz ufe Chilewäg.
Und höich am Gsims, wo d’Röisli stönd,
Gsehst as ne roti Bäggli chönd:
Nomoll, das macht eim zwäg!
So, dänkt dr Liebgott, jetz isch rächt.
Ist alls ächly verchuelt.
Wend mein doch wider heiter ha.
Sant Peter, lo mer d’Sunne a!
Lue, wie si wider spuelt! |