| lyric | Scho fänd so d'Bäggli z'röite a.
Wie wäri au sä froh,
Chöt ich mit dir nu einist, Chind,
Ä Rung durs Läbe goh!
I ha dr Wäg älei nie gwüßt,
Verloffe hett’ mi au,
Wär ich nüd dyne Auge no,
My guete Geist, my Frau.
Und got ’s au dure krüpplet Wald,
Bin jo ä Musikant;
Wän d’Härz üs müed und trurig sind,
Sä nimmt ’s Pfyffli z’Hand.
Und spile druf äs uralts Lied:
Es syg vor alter Zyt
Ämol ä Gartegottes gsy;
Wüß niemer won r lyt.
Due heiged ä zwei Chinde gsuecht
Im Wald, alltag und Stund,
Und grüeft bi jedrem Sunneblick:
Dr Gartegottes chunt!
Dr Gartegottes ist nüd cho.
Si sueched eister nu.
Ha glych scho traumt mer lauffed dri,
Marieli, ich und du. |