| lyric | Im Summer, im Summer,
Wän d’Taulüftli chönd,
Weißt niemer was mir dä
Für Türli ufgönd.
Gott bhüeti, höichs Chämi,
Langwyligi Stadt!
Die apräukte Chefi,
Wie bin s’ au satt.
Bi sälber au apräukt.
Jetz gohni ufs Land,
Und bad mi im Bächli
Milchwyß und im Sand.
Kei Fisch und kei Vogel
Zieht ase i d’Wält,
Sä häluf und lustig
Und liechter a Gält.
Mys Hürößli holi
Im Hagelnußgstüüd.
Ist gäng wien ä Stäke,
Und chosted mi nüd.
A Amsle blost d’Flöite
Am Wäldli zuem Tanz.
Waldvogel, gottgrüeßdi!
Ha Summervokanz.
Geut Tag wohl, liebs Stedtli!
Dich nimi is Gfächt!
Ist d’Herbärg au minder,
Dr Chäller ist rächt.
Wil höicher nu fahre,
Wo d’Bärgdöirfli sind,
Und vierschröitig Bure
Und böisartig Hünd.
Gottgrüeßdi, liebs Döirfli!
Wie d’Hundswar au tuet,
Weiß glych nu äs Härzli
Mit willigem Bluet.
’s git eister nu eini,
Hät Blueme am Gsims.
Was gschausches, liebs Bürschtli?
Styg ufe und nimms!
So hend’s jungi Chätzli
Und d’Maitli bis hüt:
Si zeiged dr Zähndli,
Und - byßed di nüd.
Fryluftig im Bärgland!
Fryluftig im Tal!
As eine wird nünzgi
Ist ä Sältene Fal.
Fryluftig wils’ sunned!
Härz, wehrdi und fahr!
Dr Tod, dr Landtjäger,
Ist hinder dr har. |