| lyric | Es ist ämol vor alter Zyt
Ä Chüngetochter gsy;
Schöin wien ä Sunntigvormittag.
’s chönd vil, kei ritter ane mag.
’s müend all am Schloß verby.
Due chunt dän einist vor em z’Nacht
Ä arme Musikant.
Wie där hät aso d’Lute schlo,
Dr Ote wil ne nümmem goh;
Es zittred Härz und Hand.
Und d’Chüngetochter, hert bim Tron,
Si weißt nüd was si tuet.
Wyß wird si wie im Gwülch dr Mo,
Hat ’s Ringli flingg vom Finger gno,
Und leit em ’s i sy Huet.
Landfrönde Singer, liebe Ma,
Du chast mer ’s über alls!
Zrugg schlot si ihre sydi Flor,
Ufgoht re ihres guldi Hoor.
Si fallt em ume Hals.
Jetz spil du i mym Chämerli,
Selang my Liebi glüeht.
Mys guldi Hoor is nüd sä fyn,
Sä guldig ist kei Sunneschyn,
üAs wie dys guldi Lied.
Und wo d’Hoflüt wend gigele,
Stoht uf dr Chüng, ’s wird still.
’s ärmst Bättlerchind liebt fry im Rych;
My Chind stoht alle andre glych,
’s cha gäre ha wer’s wil.
Wie gly ist au äs Jöihrli um,
Gly wien ä Maienacht,
Wän d’Liebi eim i d’Arme ninnt!
O Maienacht, o Chüngechind,
Wie sälig hand s’ mi gmacht!
Wän aber ist der Chüng uf d’Jagd,
Wie flismed alls am Hof:
Ä Luteschläger, was nützt där?
Jo, wän r nu ä Stallchnächt wär;
Sy Fulked ist ä Stroff.
Dr singt dr ganzusländig Tag.
Meint gwüß dr syg ä Lärch,
Und ist je blöiß ä fule Dachs.
Wär gschyder, spunn dä Mägde Flachs,
Statt Nareliederwärch.
Dr Schyber i dr Chanzely,
Där sait: Es ist ä Plog.
Wie schrybi voll mängs Pärgimänt,
¨Was goht nüd Arbed dur my Händ,
Und där - där singt am Trog.
Dr Hofkaplan chybt bsunderbar:
Das ist ä liechti Hut!
Hät grochsed r um ihres Chleid,
Und more singt r wien ä Heid,
Sä meisterlosig lut.
Dr Luteschläger, won r ’s köirt,
Keis Wöirtli hett r to.
Still ninnt r d’Lute, bindt sy Gurt.
Wie ’s nachted goht r heimli furt:
Adie, ihr Auge blo!
Adie, i wil bizyte furt,
Chung au mys Härz i Not,
Bivor as chunt ä böise Wind,
Und macht dys Gsicht, o Chüngechind,
Nu vor Verbärmisch rot.
Und plogst di wäg dem faltschne Ma
Und wäg sym Bättlerstolz,
Kännst du im chrankne Fink sys Loos?
Är macht si heimli vo dr Stroß
Und stirbt im grüene Holz. |