| lyric | 1. Schöners git's uf Erde nit,
als mîs Alpeland
als mîs Weidli, als mî Hütt’
ader Felsewand.
Lueg, wie d’Berge mächtig rage,
lueg, wie glänzt der Firneschnee!
Da git’s wahrli nüt meh z’frage:
Schöners gits nit meh!
Gang und lauf, so wie de Wit:
Schöners git’s uf Erde nit:
Als mîs liebe Alpeland,
als mîs schöne Vaterland!
2. Menge het viel Geld und Guet,
isch a grosse Heer.
I bi rîch a frohem Muet
nit a Gold und Ehr.
Aber weni d’Berge gschaue,
gseh die liebe Chüeli gah,
wachst mer’s Herz i Gott vertraue,
de bin i a rîche Ma!
Gang und lauf, so wie de Wit:
Richers git’s uf Erde nit:
Als mîs liebe Alpeland,
als mîs schöne Vaterland!
3. Ja i bin e rîche Ma,
rîch a Glück und Freud.
Uf dr Alp em Himmel nah
plaget mî kei Leid.
’s schönste Guet uf Gottes Erde
het mer Gott i d’Wiege g’leit:
Frei im Lebe und im Sterbe,
frei bin i in Ewigkeit!
Gang und lauf, so wie de Wit:
Freiers git’s uf Erde nit:
Als mîs liebe Alpeland,
als mîs schöne Vaterland! |