| lyric | Es ist ämol ä Tambur gsy.
Rumbumm!
Där ist mit syner Kumpäny
Eis z’Chrieg is Wäschland ine.
Si hend eis Huginotte tütscht.
Hend sälber köirig Chlepf verwütscht.
Rumbumm!
Si hend dr fränkisch Ghüng vo Moo
Rumbumm!
Z’mitzt dure Find uf Parys to,
Mit syne schöine Fraue.
Due sait dr Chüng: Was wäri hüt,
Hett ich nüd d’Schwyzer Gvaterlüt?
Rumbumm!
Wän isches gsy! Im Moned Mai.
Rumbumm!
Dr Tambur chunt älleinige hei,
Mit häibard und Trumme.
Bi Yvri, weles Modijo!
Sy Kumpäny hend d’Rappe gno.
Rumbumm!
Jetz grüeßdi Gott, mys Vaterland!
Rumbumm!
Är ninnt dr Schlegel i sy Hand,
Und trummed ’s Dorff durufe.
Und wäni au älleinig bi,
’s Härz brinig vo dr Kumpäny.
Rumbumm!
Und won er goht durs Dorf druruf,
Rumbumm!
Gönd gleitig alli Schybli uf,
Und d’Gsichter lönd si vüre.
Dr Tambur gsehnd s’ dur d’Gaß ufcho,
Sy Kumpäny au hinneno.
Rumbumm!
Gottlobunddank, nüd eine fählt!
Rumbumm!Si chromed Ruehm und guldis Gält;
Willku, ihr liebe Chnabe!
Und wo’s am Rothus duregoht,
Wie flütt’red ’s Fähndli füürzündrot!
Rumbumm!
Dr Tambur chunt vor d’Chiletür.
Rumbumm!
Und orgeled’s nüd innevür?
Und tuet’s nüd Füfibäte?
Heiland, wo ist ’s Soldatekor? !
Dr Tambur stoht ällei am Tor.
Rumbumm!
Ihr gute Lüt, lönd’s Jomm’re sy!
Rumbumm!
Im Wältschland lyt my Kumpäny,
Und wo - das wüssed d’Rappe.
Und hend r mer s’ gseh noecho,
Sen isch, will s’ hie wend uferstoh.
Rumbumm!
Wer walbed det zum Pfeister us?
Rumbumm!
Äs Maitli wien ä Hochsigstruß;
Keis asligs meh uf Ärde.
Jetzt höirt dr Trummeschlegel gschwind:
Gottgrüeßdi, mögigs Schwyzerchind!
Rumbumm!
O Tambur, säg, wo häst my Gsell?
Rumbumm!
Bis uferstaht sy armmi Seel,
Das magi nüd erbeite.
’s ist scho ä erb’ri Ebigkeit
Si är hät’s Baner ’s Dorff abtrait.
Rumbumm!
Se häst nüd uf mich beited ka?
Rumbumm!
Dr Tambur wirbled was r cha
Dem schöine Maitli z’Ehre.
Druf ist r widerum dervo.
Lang hät me köirt sy Trumme goh.
Rumbumm! |