| lyric | Jetz willi uf und z'Chrieg, Marie!
Es mauglid scho ums Hostedli,
Und ’s hornid i dr Täiffi.
I Üserherrges Name, Franz,
Blyb au! ’s ist nu nid heiterglanz;
D’Chüeh bäggid blos im Gade.
Und ghörsch nid was da unde chyt?
Marie, jetz la mi gah, ’s ist Zyt;
Es trummid i dr Äbni!
Gah nid! Voruße hokt der Tod,
Und dängelid im Morgerot
Sy Sägetse, Blyb by mer!
Jetz gimmer har my stürzi Hued,
Marie! Es wimslid mer im Blued;
I darff nid länger sume.
Se gahè Und chust mer ume, Franz,
Se willi my Wyßsunntigchranz
Diär ufe Blächhued legge.
Und sötti halt mid Tod abgah,
A d’Himelstüre willi stah,
Marie, und uf die beite.
My liebe Franz, wänt nümmer chust,
Se beit mer im Soldaterust
Im Himel z’mitzt driinne.
Marie, ich mue.s am Tor wachtstah,
Will jede Herr dra Schyzer ha,
De gwüß au Üserherrged.
Glych, miär wend läbe, liebe Franz.
Drumm wäg is a zuem Hochsigtanz
Mid dyner Hälibarde! |