| lyric | Wän isches gsy? I alter Zyt.
Bi Sämpich ligged d’Schwyzerlüt.
Hüt sött’s es einist haue!
Das welis Überherrged gä
As der Gang miär ruch Alpechräh
Vernütiged die Pfaue!
Dr Herzog Lütpold, schön und jung,
Said: Hüt, jehr Herre, gilt’s dr Schwung
Mit dene chärsche Hirte!
Was rüefft ä Graf: Ä ringe Struß!
Wer schland am Faß dr Zapfe us,
Und Rote wemmer wirte!
Si stygid appe ab em Roß.
Se chum is jetz nu, Eidginoß,
Mer wend di weidli spieße!
Wer bäggid due? Dr Uristier.
Wie wän ä Laui appefiehr,
Chönd d’Eidginosse z’schieße.
Die Ritterspieß stand wien ä Mur;
Nid eis Hirthämli chund derdur.
Wie byßt dr ysi Igel!
Druf ist dr Winkelried vora!
Sy Eidginosse hindena.
Haarus, jetz lat dr Rigel!
Hüt hend s’ dr Tod eis uf dr Stör.
Si nißnid si i d’s Ritterheer,
Si frßid si durdure.
Die Alte hend is z’wüsse ta,
Was Trüwi zue dr Heimed cha,
Wie putzt hend all vier Bure.
Wie hend s’ die Herrelüt verwätscht!
Wie hend die Schwyzerchnüttel tätscht!
Wie’s Buechis wettig schyte.
Derna wo d’Ritter wend verpflieh,
Sind ihri Hängste nümme hie.
Se chönd s’ nid heizue ryte.
Was hed dr Herzog Lütpold gmacht?
Är staht z’mitzt inne i dr Schlacht,
Und trait d’Habsburger Fahne.
O Herr, o Herr, gend gleitig Bäch!
Was wend r i dem Gstungg und Gstäch,
Dr Hau chund scho doane!
Dr Herzog Lütpold, jung und schön,
Staht grediß wien ä Tann im Föhn,
Und said: Walls Gott verhüete!
Hie stahni und hier blybi stah!
Es hed so mänge brave Ma
Scho für mi müeße blüete.
O Herr, det chund das offe Grab!
Und üi Frau und üe Chnab,
Wie tüend s’ nid uf i plange!
Dr Herzog said keis Wörtli meh.
Är zücht sys Schwärt, se bleich as Schnee,
Und schwänkt sy Fahnestange.
Und jetz ist d’Laui uf em gsy.
D’Hüed flügid ab und d’Chöpf derby.
Dr Herzog schwänkt sys Zeije.
Bist du dr Chüng vo Österrych? !
Red, Rystetschuupp, sust gist ä Lych!
Mer sind jetz just am mähje.
Dr Herzog hed keis Wörtli gsaid.
Sys Schwärt gid aber redli Bscheid.
Se stirb! Jetz mueß er ghye.
Und wyter gaht’s. Haarus, haarus!
Si tnazid midene Schlunggus;
Keis Bättle hilft, keis Chnüe.
Wo s’ aber d’Schlacht hand gschlage gha,
Se gsehnd s’ am Held dr Herzog a,
Nid syner Pfauechappe.
Sy Chrusel drunder sind voll Blued.
Si lüpfid ihre Ysehued,
Und chnüid vor em appe. |