| lyric | 1. Zur Stadt us und am Berg entlang,
da gaht e steili Strass,
de Hüsere na am Rebehang,
die alti oberi Strass.
Verschwunde isch de Haldebach,
s alt Chileli a de Strass,
doch blybt in euse Herze wach,
das alti Oberstrass, das alti Oberstrass.
2. Jetzt gaht e neui Strass dur y,
Motorelärm und Gas,
me gwöhnt sich dra und schickt sich dri,
s git Schlimmeres als das.
Wer Rueh will gaht de Geissberg ue,
da findsch no Bäum und Gras,
da obe häts no Suurstoff gnue,
s ghört au zu Oberstrass, s ghört au zu Oberstrass.
3. Am Waldrand lyt en Weiher au
mit Frösche und mit Mölch,
drin spieglet sich de Himmel blau,
de Wald und wysses Gwölch.
Devor uf grüener Resiwiis,
all Jahr zur Bundesfyr,
da brännt en dürre Hufe Chriis,
es mächtig zünftigs Füür, es mächtig zünftigs Füür.
4. Bim Rigiblick häts Gärtli
und Schattebänkli gnue,
gang haus und mach es Fährtli,
s Seilbähnli füehrt dich ue.
En Ussicht häsch is Bergrevier
und übere bis a d Glatt,
me sait vo euserem Quartier:
De Balkon vo de Stadt, de Balkon vo de Stadt.
5. Vom Poly bis zum Strickhof ue,
vom Riedtli bis an Wald,
wo Grüens no git, händ Sorg derzue,
verbetoniert ischs bald!
Und ischs so wyt,
dass mir müend gah,
was meinsch, wie schwer wird das,
mer möchted doch und würdet gärn
no blybe z Oberstrass, no blybe z Oberstrass! |