| lyric | Chum Schatz, chum Schatz, jetz wemmer hei!
Es taged jo scho überei,
Und ’s räukt scho bärgesthalbe.
Und d’Musig hät dr Schlunggus gmacht.
Chum hei, verby ist d’Chilbibnacht.
Bei nu äs Bitzeli, Marie!
Sie ziehnd nu eine hinnedri;
Und meinst dr Bärg tüeg räuke,
Henu, sen ist das Morgedrot
Dr Schy wo vo dym Bäggli goht.
Nei, liebe Schatz, lueg ’s Pfeister a!
’s tüpft scho äs guldis Händli dra
Det us em Bärgahore.
Chum gleitig hei, ’s ist höichst Zyt!
Und köirst nüd, as äs Glöggli chyt?
Und köirst äs Glöggli neimewo,
Marie, mueß i dym Stimmli goh;
Und äni Pfeisterschybe
Glänzt asewäg vom Lampeschy
Und ’s spiegled si dys Händli dri.
Nei, liebe Schatz, dr Morged chunt;
Und wän’s is uf d’Tanzdili sunnt,
Dä darfi nümme heizue.
Es gsächt nümme heizue.
Es gsächt mer’s jedi Türesell
Und Gsims a, as i giengt dur d’Hell.
Marie, Marieli, blyb mer nu!
Und tage’s dä, gönd ich und du
Hei dur die gäälig Sunne.
Und dä gseht’s alls, as du bist mys,.
Und as i goh durs Parädys. |