| lyric | 1. Ad ais inglur ün cumünet,
ün lö chi m’ais taunt cher;
el ais be simpel e pitschnet,
ma eau nu’l poss schmancher.
Dasper il flüm vo rumurand
l’antica sa chanzun,
e la lavina fracaschand
as bütta giò’l vallun.
2. Ils pros intuorn scu ün bel ram,
ers mellans traunter aint,
ün craunz da god scu bel recham
ed alvs vadrets suraint,
e cò il pövel in lavur,
il pled rumauntsch ladin,
e lo il lö da prüm’ amur,
pertuot algord cherin.
3. E quaist ais il sulam dal bap,
da mamma, frer e sour,
e mincha bös-ch e mincha crap
discuorra cun mieu cour,
e tuot am fo immaint d’pü bod
e’m fo güvler perche
tuot que ch’eau vez e que ch’eau od,
ün’ orma ho per me.
4. E sch’eir quaist pover dür sulam
sa glieud nu po nudrir,
sch’ün our i’l ester sto pü lam
e viva eir pü sgür:
Üngün pajais nu m’ais taunt cher cu tü,
mieu cumünet,
e cò da viver e poser
adüna eau bramet. |