| lyric | Un juen bel pêr
da deschdot ons
sa dera uni
per so maridar.
„O tü figl pers,
o tü figl schlet,
sch’tü piglasch a quella,
schi vegnsch ün pôret!“
Que jet el via
quintond a sia spusa,
co cha quai sia
er passà.
„Scha tia mamma
nu vo laschar tor,
schi piglia ün’ atra
i a mai lascha qua!“
„O na, o na,
quai nu po jau brich far,
ün atra tor i
a tai laschar qua!“
Qua jettan ês via,
cumprettan pistolas
i gnognd in naun
sa dettan il maun.
I füttan chattats,
i füttan mainats
id in santeri
sepulits
I sün la fossa
dal juen bel mat
crescha ün bos-ch
da nusch nus-chat.
I sün la fossa
da la juvna bella
creschea ün bos-ch
da flur chanella.
Qua’s po bain vezer,
scha quès s’amean,
perfin las fluors
insembel s’braunclean.
Cur chi d’es ün pêr
chi s’aman da cor,
o genituors,
laschà’ls pür sa tor! |