| lyric | La daman cur stailas glüschan
stun eu sü e vegn sül munt,
mia duonna e meis pitschens
sun amo in sön profuond.
Sü pel truoi es aint pel god
da bun pass eu vegn vers l’ot.
Sü pro’l grip fetsch ’na fermada,
guard ingiò i’l ajer fin,
vez giò l’En tras la vallada,
vez ma chasa, meis cumün.
Il motiv, pel qual sun qua,
squasi n’ha eu invlüdà.
Nun am sgrisch passand la grippa,
sül vadret met franc meis pè,
là in quelly blaisch plü stippa
vez chamuotschs in ün rudè.
Scha furtüna hoz eu n’ha,
almain ün eu port a chà.
Scha’l clestin vuless ch’eu chatta
giò’l chafuol dandet la mort,
schi la schmagn’immens’ ais statta
tschert la causa da ma sort.
Lur’ meis chars nu stais cridar,
eir sül ot s’po bain posar. |