| lyric | A bunura, già a las tschinch,
dà il svagliarin ün scling!
Quai voul dir: Jonin, sta sü,
hoz da alp poust ir eir tü!
Cur cha tuot es lura pront,
eir Jonin, nos „paster grond“,
cun sa buscha sülla rain,
cloma’l: „Hoz ad alp nus giain.“
Hü e hot, las vachas van,
ellas bain la via san.
Tras cumün, che rupertöz –
culla s-chell’intuorn culöz!
Cur chi va ün pa amunt,
Jon, quel terdscha giò il frunt!
„Ir ad alp, mo che fadia!“
Bap, quel squitsch’ün ögl e ria.
L’ura muossa vers mezdi,
glieud e muvel sun casü.
Nos Jonin, qual chant’e ria:
„Ir ad alp, che allegria!“ |