| lyric | wo als kandidat dr hugo sanders
gredt het vor dr wahl, het jede gmeint
wenn dä einisch gwählt syg, wärd alls anders
und drum hei e huufe lüt vereint
ds losigswort usgäh: wählet dr sanders!
de wird’s i dr schwyz de äntlech anders
nach syr wahl het är, es isch begryfllech
zersch chly zuegluegt, wi’s im rat so geit
denn bevor me’s überleit het ryflech
isch’s ja gschyder, dass me nid zvil seit
aber wartet nume, het dr sanders
gseit, gly wird’s ir schwyz de äntlech anders
und är het sech gründlich ygarbeitet
und het gwartet uf ne glägeheit
mit der red won är het vorbereitet
einisch z’säge, was süsch niemer seit
wenn’s de mal so wyt isch, het dr sanders
gseit, de müesst dr luege, de wird’s anders
d’glägeheit isch lang nid cho, hingäge
het’s nen afa dünke mit dr zyt
‚as är da sech vorgno gha het z’säge
stimm ja scho, doch göng’s vilicht chly z’wyt
s’isch nid ganz so eifach, het dr sanders
gseit, i formuliere’s gschyder anders
är het gwüssi ywänd müesse zuegäh
und s’het details gha, wo nid hei gstimmt
und i muess o, het er tänkt, druf luege
dass dr bundesrat’s nid übelnimmt
mit em chopf dür d’wand, so het dr sanders
gseit, das nützt ja nüt, de wird’s nid anders
är het korrigiert, ergänzt und gstriche
immer wider a syr grosse red
so isch’s cho, dass d’amtsduur isch verstriche
ohne dass er je se ghalte het
mänge wird dr sanders jitz uslache
und wird dänke: ja, das chunnt dervo
die wo sälber nüt wei anders mache
lache sicher bsunders schadefroh
darum machet’s anders als der sanders
nämlech machet’s, anders wird’s nid anders
darum machet’s anders als der sanders
nämlech machet’s, anders wird’s nid anders |