| lyric | 1. Am Egge vo de Bahnhofstross isch d‘Nüni-Haltstation
deet warted scho di allerlängsti Ziit
en Pfarre und en General, en Kaiser und en Clown
und wundered sich all, a was dass‘s liit.
Worum goots hüt so choge lang
es chunnt und chunnt und chunnt kei Tram
etz wartepmer scho fascht e Stund
da isch doch weiss de Treu nid gsund
Ref.:
Wänn chunnt ächt s‘alti Nünitram
es goot hüt würkli psunders lang
mit sine alte Schlotterglänk
hätts Angscht vor allne Ränk
2. De Pfarre seit, herjeminee, ich bi ganz durenand
ich sött scho lang bim Hochzigspärli sii
dänn d'Bruut, die wartet etz veruss im fiine Hochzigsgwand
und fangt sich sicher no en Pfnüsel ii
De Messmer lüüted ohni Änd
und hät scho Blootre a de Händ
de Brütigam wott hei zue goo
und seit, er überlegg sich's no
3. De General stampft mit em Fuess ufs Trottoir, dass kracht
und fluechet luut, de Pfarre wird ganz rot
Ich chume ganz bestimmt no z'spoot zu miner nöchste Schlacht
verstoot dänn würkli niemert mini Not ?
d'Soldate lached s‘Füschtli voll
und findeds ohni Chriege toll
si ligged alli uf em Näscht
und fiired deet e grosses Fäscht
4. De Kaiser trüllt scho ganz nervös es Szepteri de Hand
er sött scho längstens wieder uf de Thron
Er hätt scho neui Gsetz parad für d'Bürger vo sim Land
etz stoht er do, und wartet — s'isch en Hohn.
Doch d'Lüüt sind ohni Kaiser froh
und findets alli glatt eso
Me heig jo scho en Huufe Gsetz
und alli finded, s‘tätis etz
5. De Clown luegt nume zue, we alli andre zwirblig sind
er macht bi all däm Chlage gar nid mit.
Er seit nu liislig: Ich sött möglichst gschnäll no zu de Chind
und sorge, dass deet öppis z'lache gitt.
Ref.:
I däm Momänt fahrt s'Tram scho ii
bi Clöwn, do isch es gern debii
Es hät sich äxtra ööle loo
me cha doch Chind nid warte loo
Ref. Und trotz de alte Schlotterglänk
saust s‘Trämli wienen Blitz um d'Ränk
und d‘Lüt vo däre chliine Stadt
die sind vor Stunne platt.
Nei so öppis ! |