| lyric | 1. Ich känn en chliine Zirkus ime wiite grüene Land
dä zieht mit sine Chärre scho sit langem umenand
Es Zält isch alt, d'Artischte au, de Mascht stoht meistens schräg
de Zirkus Bromboballi isch nu na so halbe zwäg
Doch trotzdäm lönd sich d'Lüüt vom Zirkus ihri Schau nid näb
s‘wird immer jeden Obig none Super-Gala gäh
und öpper isch ganz wichtig für di grossi Zirkus-Schau
bitteschön, ich stelle vor: d‘Zuckerwattefrau
2. Si isch scho ehnder mollig, und si hät en chliine Buuch
es Hoor isch fascht scho z' blond, und ihri Stimm, die tönt ganz much
si sammlet d'Billett ii am Ilgang, und si striicht si grad
dänn chames nomoll bruuche mom, nid spare wär do schad
Chuum sind die zäh, zwanzg Lüt im Zält, do goht si hindern Stand
und nimmt mit grossem Ernst es Zuckerwattegschäft a d‘Hand
und Programm sälpferstäntli, die verchauft si flissig au
isch um jede Franke froh: d'Zuckerwattefrau
3. De Herr Tiräkter ime alte Frack und scheppsem Huet
dä seit mit furchtbar ernstem Gsicht, was ihn etz freue tuet
dass es di ersti Sensation vom Oobig mälde chön:
Si wärded alli Träne lache über üsi Clöön!
Zwei Maa i de Arena, mit chli Puder uf em Gsicht
die kämpfed zimmli Iustlos gäge s'Alter und gäg d‘Gicht
nu öpper ganz ellei im Zirkus lachte paar mol rauh
dreimol roote - klar - d'Zuckerwattefrau
4. Etz jaged sich di grosse Nummre ali Schlag uf Schlag:
Ein bambelet chli am Trapez, ein macht de Überschlag
Doch etz, seit de Tiräkter, chunnt e Nummere wo packt:
Ganz ohni Netz, die Sensation: De Super-Balance-Akt!
d‘Artischte riibed sich scho flissig mit Magnesia ii
stönd ufenand, und jede wetti gern im Glichgwicht sii
Wer aber zieht de Mantel ab, und dient als Underbau:
Si stämmt alli hoch - d'Zuckerwattefrau!
5. Und wänn de Zirkus wiiterzieht mit Maa und Chind und Frau
und nu na e chli Sägmähl bliibt vo dere grosse Schau
dänn hett ich, ohni das es öpper weiss, e chliini Bitt:
Ich wüür am liebste sofort mit de Zirkuswäge mit.
Elleige stand ich uf de lääre grosse Chilbiwiis
verstecke mini Bitt !d‘Gräser, s'Sägmähl und de Chies
und wänn Du Dir chli Müeh gisch, ich bi sicher, schmöcksch es au:
s'schmöckt doch immer no nach - Zuckerwattefrau |