| lyric | 1. Si hät de zäht Geburtstag, und es gitt e Päckli-Fluet
au irgend sone Tante macht, wa jedi Tante tuet
Si bringt e chliini Nütigkeit, und artig seit da Chind
ein vo de Sprüch wo offebar no immer Mode sind:
Also da wär etz nid nötig gsii
2. Si wird vor allem älter, und säb wär jo dänn nid rächt:
si wird au plötzli attraktiv für die vom andre Gschlächt
En Purscht schleikt roti Rose aa, gschnäll klauet irgendwo,
di Holdi lächlet liecht verchrampft, und reagiert dänn so:
3. Me isch sich trotzdäm nöcher choo, d'Natur chunnt scho zum Rächt
Nu hät dänn d'Nööchi Folge gha, und sah isch ehnder schlächt.
Wo d'Tochter zu de Eltre chunnt mit ihrem Nochwuchs-Pricht
isch alls, wa si do ghört uf ihri schiefi Liebes-Gschicht:
4. E Hürot gitts, und glii en Bueb, de Maa wird Prokurischt
me leischted sich e Wohnwand mit re spoote Zahligsfrischt
De Maa schwirrt au mol ab, und bringt dänn spööter Pralinées
Si merkt es schlächti Gwüsse nid, und seit we eh und je:
5. Und Ziit vergoot, nu weiss me grad i däm Fall gar nid wie
dänn 's Läbe bruucht au s' ""Nid-so-nötig"" dringend öppedie.
Es gsäächti rächt vill ärmer uus uf däre schiefe Wält
wärm jede blos grad s'Nötigscht tät, und s'Läbe sich vergällt (mit)
6. Si liit etz scho sitt Johre uf em Fridhof näbetdraa
ich Stande vorem Grab und luege d'Grabstei-Inschrift aa:
E Läbe ohni grossi Egge, wämes überleit,
e Läbe wo villicht sogar denoo en Ketzer seit:
7. Min Blick goot etz vom Fridhof wägg bis übere is Land
doch d'Wiiti wird scho bald verspeert dur sone Beton-Wand
und bi däm grosse Chüelturm, wo e Gegend ganz vertruckt
do merk ich plötzli, we an mir dä Satz sich füretruckt:
Also da wär etz würkli nid nötig gsii! |